පසුගිය සතියේ අවසාන ගනුදෙනු දින දෙක තුළ කැපීපෙනෙන වර්ධනයක් අත්පත් කර ගැනීමට කොළඹ කොටස් වෙළඳපොළ සමත් වුවද, මෙම සතියේ පළමු දිනයේ දීම මිල දර්ශකවල පහළ යාමක් ඊයේ(19) දිනයේ දී වාර්තා විය.

ඒ අනුව දිනය තුළ සියලු කොටස් මිල දර්ශකය ඒකක 125.63කින් පහළ ගිය අතර S&P SL20 දර්ශකය ඒකක 38.08ක පහළ යාමක් වාර්තා කළේය. එහිදී දිනයේ ගනුදෙනු අවසානයේ දී සියලු කොටස් මිල දර්ශක අගය ඒකක 20,059.42ක් ලෙසත්, S&P SL20 දර්ශක අගය ඒකක 5,700.75ක් ලෙසත් වාර්තා වුණි.

මේ අතර ආයෝජකයින්ගේ සක්‍රීය දායකත්වයක් ඊයේ දින කොටස් වෙළෙඳපොළෙන් දක්නට නොලැබුණු අතර එහි ප්‍රතිඵලයක් ලෙසින් දෛනික පිරිවැටුම රු. මිලියන 680ක් දක්වා පහළ ගොස් තිබුණි.

අද දෙරණ