ශ්‍රී ලංකාවේ සන්නිවේදන සහ ඩිජිටල් ක්ෂේත්‍රයේ අනාගතය වෙනුවෙන් නව මාවතක් විවර කරමින් ZTE ලංකා සමාගම විසින් සංවිධානය කළ ‘ZTE Day 2026’ තාක්ෂණික සමුළුව පසුගිය දා ගාලු මුවදොර හෝටල් පරිශ්‍රයේ දී ඉතා සාර්ථක ලෙස පවත්වන ලදී. ශ්‍රී ලංකාවේ ඩිජිටල් පරිවර්තනය වේගවත් කිරීමට නවතම තාක්ෂණික විසඳුම් රැසක් හඳුන්වාදෙමින් පවත්වන ලද මෙම උත්සවය සඳහා සන්නිවේදන ක්ෂේත්‍රයේ ප්‍රමුඛයින්, ව්‍යාපාරික හවුල්කරුවන්, තාක්ෂණවේදීන් සහ මාධ්‍ය නියෝජිතයින් ඇතුළු සම්භාවනීය අමුත්තන් රැසක් සහභාගී වූහ.

“බුද්ධිමත් අනාගතයක් නිර්මාණය කිරීම” (Creating an Intelligent Future) යන තේමාව යටතේ පැවැත්වුණු මෙම සමුළුවේදී, සන්නිවේදනය, පරිගණක තාක්ෂණය, කාර්යසාධන හැකියාව සහ බුද්ධිමය තාක්ෂණය යන මූලික කරුණු ඔස්සේ නවෝත්පාදනයන් මෙහෙයවීමට ZTE සමාගම සතු කැපවීම මැනවින් ප්‍රදර්ශනය කෙරිණි. දියුණු තාක්ෂණික විසඳුම් මඟින් මිනිස් පරිකල්පනය සහ යථාර්ථය අතර පරතරය අවම කර ශ්‍රී ලංකාවේ ව්‍යාපාර, ප්‍රජාවන් සහ පාරිභෝගිකයින් වෙත නව අවස්ථා උදාකරනු ලබන්නේ කෙසේද, යන්න පිළිබඳව මෙහිදී පුළුල් ලෙස සාකච්ඡා කෙරිණි.

විදුලි සංදේශ සහ තොරතුරු තාක්ෂණ ක්ෂේත්‍රයේ ගෝලීය දැවැන්තයෙකු වන ZTE සමාගම, දියුණු ජාල යටිතල පහසුකම් (Network Infrastructure), ස්මාර්ට් උපාංග සහ ඉදිරි පරම්පරාවේ (Next-generation) තාක්ෂණයන් හඳුන්වා දෙමින් මෙරට ඩිජිටල් පරිසර පද්ධතිය හැඩගැස්වීම සඳහා අඛණ්ඩව සුවිශේෂී දායකත්වයක් සපයනු ලබයි. මෙම උත්සවය ZTE සමාගමේ උපායමාර්ගික දැක්ම, තාක්ෂණික හැකියාවන් සහ ශ්‍රී ලංකාවේ ඩිජිටල් සංවර්ධනය සඳහා ඔවුන් දක්වන දිගුකාලීන කැපවීම විදහා දැක්වූ අවස්ථාවක් විය.

තව ද, මෙම අවස්ථාව අමතමින් ශ්‍රී ලංකාවේ චීන තානාපති චී ජෙන්හොං (Qi Zhenhong) මහතා ප්‍රකාශ කළේ, ආර්ථික සංවර්ධනය වේගවත් කිරීම සහ ජන ජීවිතය ඉහළ නංවාලීම සඳහා ඩිජිටල් තාක්ෂණය මේ වන විට විශාල කාර්යභාරයක් ඉටුකරන බවයි. එසේම විදුලි සංදේශන, ඩිජිටල් යටිතල පහසුකම්, කෘත්‍රීම බුද්ධිය (AI) සහ ස්මාර්ට් නගර (Smart Cities) සංවර්ධනය වැනි ක්ෂේත්‍රයන්හි චීනය සහ ශ්‍රී ලංකාව අතර සහයෝගීතාව පුළුල් කිරීමට විශාල ඉඩකඩක් පවතින බව ද ඔහු පෙන්වා දුන්නේය. එමෙන්ම, ZTE ඇතුළු චීන ව්‍යවසායකයන් විසින් ශ්‍රී ලංකාවේ ඩිජිටල් පරිවර්තනයට සහ ‘එක් තීරයක් – එක් මාවතක්’ (Belt and Road) වැනි උසස් තත්ත්වයේ සහයෝගීතා ව්‍යාපෘති සඳහා අඛණ්ඩව දායක වනු ඇතැයි තමා විශ්වාස කරන බව ද තානාපතිවරයා තවදුරටත් පැවසීය.

මෙහිදී අදහස් දැක්වූ ZTE ලංකා සමාගමේ ප්‍රධාන විධායක නිලධාරී ජාඕ ලියෑං (Zhao Liang) මහතා මෙසේ ප්‍රකාශ කළේය. “ZTE Day 2026 හරහා ප්‍රදර්ශනය වන්නේ ශ්‍රී ලංකාවේ ඩිජිටල් පරිවර්තනය වෙනුවෙන් අප දක්වන අඛණ්ඩ දායකත්වයයි. නවෝත්පාදනය, සන්නිවේදනය සහ ශක්තිමත් ව්‍යාපාරික සබඳතා උපයෝගී කරගනිමින්, ශ්‍රී ලංකාව තුළ වඩාත් බුද්ධිමත්, වඩාත් සම්බන්ධිත සහ තිරසාර අනාගතයක් ගොඩනැගීමට උපකාරී වන තාක්ෂණික විසඳුම් ලබාදීම අපගේ මූලික අරමුණයි.”

එමෙන්ම වේගයෙන් වෙනස් වන ශ්‍රී ලංකාවේ ඩිජිටල් ක්ෂේත්‍රයට ගැළපෙන, පාරිභෝගිකයා කේන්ද්‍ර කරගත් විශ්වසනීය තාක්ෂණික විසඳුම් ලබාදීමට සමාගම දක්වන උනන්දුව මෙම උත්සවය ඔස්සේ මැනවින් පැහැදිලි විය. ZTE Day 2026 සමුළුව, ප්‍රවීණයන්ගේ අදහස් හුවමාරු කරගන්නා සැසිවාර, නවීන තාක්ෂණික ප්‍රදර්ශන සහ උපායමාර්ගික සාකච්ඡාවලින් සමන්විත වූ අතර, එය ZTE ලංකා සමාගමේ තාක්ෂණික ගමනේ සුවිශේෂී සන්ධිස්ථානයක් සනිටුහන් කළේය. එමෙන්ම සහභාගී වූවන්ගෙන් ලැබුණු ඉහළ ප්‍රතිචාරය මඟින් ශ්‍රී ලංකාවේ අනාගතය හැඩගැස්වීම සඳහා උසස් ඩිජිටල් විසඳුම්වල ඇති වැදගත්කම නැවත වරක් තහවුරු විය.

ZTE Day 2026 සාර්ථකව නිමා කිරීමත් සමඟ, ZTE ලංකා සමාගම දියුණු සන්නිවේදන පහසුකම්, බුද්ධිමත් විසඳුම් සහ තිරසාර නවෝත්පාදනයන් ඔස්සේ ශ්‍රී ලංකාව සවිබල ගැන්වීමට කැපවුණු, විශ්වාසවන්ත තාක්ෂණික හවුල්කරුවෙකු ලෙස තම ස්ථාවරය තවදුරටත් තහවුරු කරගන්නා ලදී.