ශ්‍රී ලංකාව පුරා දහස් ගණනක් පාසල් දරුවන් සඳහා දෛනික ආහාර වේලක් යනු පෝෂණය පමණක් නොව, ඉගෙනීම, වර්ධනය සහ වඩාත් සුරක්ෂිත අනාගතයක් සඳහා වන මූලික පදනමකි. මෙම පසුබිම මත, ජාත්‍යන්තර සිංහ සමාජ පදනම (LCIF) විසින් පසුගියදා කොළඹ දී මාධ්‍ය හමුවක් සංවිධානය කරමින්, සිංහ සාමාජිකයන් විසින් මෙහෙයවනු ලබන වැඩසටහන් හරහා රට පුරා ඇති කර තිබෙන බලපෑම සහ විශේෂයෙන් ලෝක ආහාර වැඩපිළිවෙල (WFP) සමඟ ඇති සහයෝගීතාවය ඉස්මතු කළේය.

ලෝක ආහාර වැඩපිළිවෙල (WFP) සමඟ ඇති මෙම සහයෝගීතාවය, ඇමෙරිකා එක්සත් ජනපදයේ ලෝක ආහාර වැඩපිළිවෙල (WFP USA) සහ LCIF අතර ඇමරිකානු ඩොලර් මිලියන 2ක හවුල් වැඩසටහනක කොටසක් වන අතර, එය ශ්‍රී ලංකාව සහ නේපාලය ඉලක්ක කර ගනිමින් ක්‍රියාත්මක විය. මෙම වැඩසටහන යටතේ ශ්‍රී ලංකාවේ ලෝක ආහාර වැඩපිළිවෙල (WFP Sri Lanka) හට ඔවුන්ගේ “ගෙවත්තෙන් පන්තියට” (Home-Grown School Feeding) වැඩසටහන වෙනුවෙන් ඇමරිකානු ඩොලර් මිලියනයක් ලැබී ඇත. එමඟින් පාසැල් ආහාර සැපයුම්කරුවන් සහ ගොවීන් ශක්තිමත් කිරීමත්, ජාතික පාසැල් ආහාර වැඩපිළිවෙල (National School Meals Programme) යටතේ පාසල් දරුවන් සඳහා ලබාදෙන ආහාරයේ පෝෂණ ගුණාත්මකභාවය වැඩිදියුණු කිරීමත් සිදු වේ.

තවද, දැනට Lions of Sri Lanka විසින් LCIF හි ඇමරිකානු ඩොලර් 400,000ක වටිනාකමකින් යුතු ‘Protect Child Nutrition’ ව්‍යාපෘතිය ක්‍රියාත්මක කරමින් සිටින අතර, එමඟින් ශ්‍රී ලංකාව පුරා දරුවන් 5,000කට ආසන්න සංඛ්‍යාවකට දෛනික පාසල් ආහාර ලබා දීම සිදු කරයි. වසර තුනක කාලයක් සඳහා සැලසුම් කළ මෙම වැඩසටහන, සමාජයට මුහුණ දීමේ හැකියාව වැඩිදියුණු කිරීම, අධ්‍යාපනය ප්‍රවර්ධනය කිරීම සහ ළමා පෝෂණය නංවාලීම සඳහා වැදගත් වේ.

මෙම මාධ්‍ය හමුවේ දී, ශ්‍රී ලංකාවේ ආහාර අනාරක්ෂිතභාවයට විසඳුම් ලබාදීමට LCIF හි ගෝලීය ප්‍රදානයන් හරහා තිරසාර වැඩසටහන් ක්‍රියාත්මක කළ හැකි ආකාරය ද පැහැදිලි කෙරිණි. එසේම, දේශීය සේවාව ගෝලීය හවුල්කාරිත්වයන් හරහා තවත් ශක්තිමත් වන ආකාරය ද අවධාරණය කෙරිණි.

මෙම මාධ්‍ය හමුවට LCIF සභාපති සහ හිටපු ජාත්‍යන්තර සභාපති ෆැබ්රිසියෝ ඔලිවේරා මහතා, ශ්‍රී ලංකාවේ ලෝක ආහාර වැඩපිළිවෙල (WFP Sri Lanka) නියෝජිත සහ මෙරට අධ්‍යක්ෂ, එසේම හිටපු සිංහ ජාත්‍යන්තර සභාපති මහේන්ද්‍ර අමරසූරිය මහතා සහ LCIF භාරකරු මහේෂ් පැස්කුවල් මහතා ඇතුළු සිංහ නායකයන් සහභාගී වූහ.

මෙම අවස්ථාවේ දී අදහස් දැක්වූ LCIF සභාපති සහ හිටපු සිංහ ජාත්‍යන්තර සභාපති ෆැබ්රිසියෝ ඔලිවේරා මහතා, WFP සමඟ සහයෝගයෙන් කටයුතු කිරීම තුළින් සිංහ සමාජය වර්තමාන පෝෂණ අවශ්‍යතා සපුරාලීම පමණක් නොව, ප්‍රජාවන්ගේ දිගුකාලීන යහපැවැත්ම සඳහා ද ආයෝජනය කරනු ලබන අතර ශ්‍රී ලංකාව යනු දේශීය නායකත්වය සහ ජාත්‍යන්තර සහයෝගීතාව එකට එක්වූ විට අර්ථවත් මෙන්ම දිගුකාලීන බලපෑමක් ඇති කළ හැකි බව පෙන්වන විශිෂ්ට උදාහරණයක් බවත් ප්‍රකාශ කර සිටියේය. කිසිදු දරුවෙකුට අනාගතයේ ආහාර අනාරක්ෂිතභාවයක් ඇති නොවීමේ අරමුණින් ඔවුන් එක්ව කටයුතු කරන බවත් ඔහු වැඩිදුරටත් ප්‍රකාශ කර සිටියේය.

LCIF ආරම්භයේ සිට මේ දක්වා ශ්‍රී ලංකාව සඳහා ලබාදී ඇති ප්‍රදාන මුදල සම්පූර්ණයෙන්ම ඇමරිකානු ඩොලර් මිලියන 17කට ආසන්න වේ. Ditwah ආපදා ප්‍රතිසාධනය සඳහා ලබාදුන් ඇමරිකානු ඩොලර් 300,000ක විශේෂ ආපදා ප්‍රදානය ඇතුළු විශාල සංවර්ධන ව්‍යාපෘති රැසක් මෙම අරමුදල් මඟින් ක්‍රියාත්මක කර ඇත.

LCIF ක්‍රියාකාරකම්වල විශේෂත්වයක් වන්නේ ලැබෙන සෑම ඩොලරයක්ම පරිපාලන වියදම් කිසිවක් අඩු නොකර සේවා ව්‍යාපෘති සඳහාම යොදවනු ලැබීමයි. මෙම ආකෘතිය හරහා සෑම පරිත්‍යාගයකම බලපෑම සහ ප්‍රවේශය වැඩි කරමින්, පරිත්‍යාගකරුවන්ගේ විශ්වාසය ද ශක්තිමත් කරයි. මෙම අවස්ථාවේ දී ඉස්මතු වූ වැදගත් කරුණක් වන්නේ, මෙම සේවාවන් පුණ්‍ය කටයුතු පමණක් නොව, හවුල්කාරිත්වය සහ විශේෂඥ දැනුම මත පදනම් වූ සංවිධානාත්මක, ජාතික වැදගත්කමක් ඇති වැඩසටහන් දක්වා වර්ධනය වී ඇති බවයි.

LCIF සහ WFP අතර ඇති මෙවැනි හවුල්කාරිත්වයන්, ශ්‍රී ලංකාවේ සමාජීය සහ ආර්ථික අභියෝගයන්ට විසඳුම් සෙවීමේ දී සම්බන්ධීකරණය වූ, තිරසාර ක්‍රියාමාර්ගවල වැදගත්කම අවධාරණය කරයි. එක්සත්භාවය, උපායමාර්ගික ආයෝජනය සහ සේවයට ඇති පොදු කැපවීම හරහා, සිංහ සමාජය ජාතියට වඩාත් ශක්තිමත් සහ ආහාර ආරක්ෂිත අනාගතයක් ගොඩනැගීමට මූලිකත්වය ලබා දෙයි

උපුටා ගැනීම : අද දෙරණ